ഈ ബലി വിതുമ്പുന്ന, വിറക്കുന്ന ഇന്ത്യക്കുവേണ്ടി

ഒരാണ്ടു മുന്‍പ് അവരൊരുമിച്ച് ചെയ്ത ഒരു സ്റ്റോറിക്കു വേണ്ടി അവനെടുത്ത, മാഗസിനില്‍ അടിച്ചു വരാതെ പോയ മൊട്ടത്തലയന്‍ കുട്ടിയുടെ ചിത്രം കാണിച്ചാല്‍ അവന്‍ തിരിച്ചറിയുമെന്നും ജീവിതത്തിലേക്ക് തിരിച്ചു വരുമെന്നും പ്രത്യാശയോടെ തുഷ ഫെയ്സ്ബുക്കിലെഴുതി. ഒരു ഫോട്ടോഗ്രാഫര്‍ എന്ന നിലയില്‍ ഏറ്റവുമധികം സന്തോഷിക്കുകയും ഊറ്റം കൊള്ളുകയും ചെയ്ത ചിത്രമായിരുന്നു അത്. ഒരാഴ്ചക്കകം തരുണ്‍ ആശുപത്രി വിടുമെന്ന് അവരെഴുതി.
പൊടുന്നനെ കാര്യങ്ങളെല്ലാം വിപരീതമായി, ഇന്നലെ പുലര്‍ച്ചെ ജൂണിന്റെ മറ്റൊരു മഴച്ചിത്രമായി വിക്ടര്‍ ജോര്‍ജിനു പിന്നാലെ അവനും പോയി.മൂടിവെക്കപ്പെട്ട വിതുമ്പുന്ന, വിറക്കുന്ന ഇന്ത്യയെന്ന നേരിനെ പുറം ലോകത്തെ അറിയിക്കാന്‍ അവന്‍ ആയുധമാക്കിയത് സ്വന്തം ജീവിതം തന്നെയായിരുന്നു. പകരം വെക്കാനാവാത്ത ഈ ബലി പാഴാവാതിരിക്കട്ടെ-മാവോയിസ്റുകളുടെ ആയുധപ്പുരയെന്ന് ഭരണകൂടവും പട്ടാളവും നമ്മളോടു പറഞ്ഞു തന്ന ഛത്തീസ്ഗഢിലെ അബുജ്മാഢ് ദേശത്തിന്റെ സത്യാവസ്ഥ പുറത്തുകൊണ്ടുവരാന്‍ നടത്തിയ യാത്രക്കിടെ മലേറിയ ബാധിച്ച് ഇന്നലെ പുലര്‍ച്ചെ ജീവിതത്തോട് വിടപറഞ്ഞ തെഹല്‍ക്ക ഫോട്ടോ ജേണലിസ്റ്റ് തരുണ്‍ സെറാവത്തിന്റെ വിയോഗത്തെക്കുറിച്ച് സവാദ് റഹ്മാന്‍ എഴുതുന്നു

ഹൈറേഞ്ചിന് ഒരു ജലസ്മാരകം

ഹൈറേഞ്ചിലെ ജീവിതവും സംസ്കാരവും നട്ടുനനച്ച ജലാശയങ്ങളുടെ അകാല മരണങ്ങളെക്കുറിച്ച് കെ. പി ജയകുമാര്‍ എഴുതുന്നു: ഇപ്പോള്‍ മീനുകള്‍ വരാറില്ല. ആറ്റിലേക്ക് ചെന്നുചേരുന്ന നീരൊഴുക്കുകളില്‍ പലതും നിലച്ചുപോയിരിക്കുന്നു. അവശേഷിക്കുന്നവ നൂലുപോലെ ഒഴുകി തീരുകയാണ്. ആനക്കല്‍ മലകളില്‍ ആരംഭിച്ച് പാലാറെന്നും കോമ്പയാറെന്നുമുള്ള പേരുകളിലൂടെ ഒഴുകി കല്ലാര്‍ കടന്ന് തൂവല്‍ വെള്ളച്ചാട്ടത്തില്‍ കുത്തനെ പതിക്കുന്ന ആറ്റിലായിരുന്നു ഞങ്ങളുടെ കുട്ടിക്കാലം നീന്തിക്കളിച്ചത്.

ജീവിതം ഒഴുകുന്നൊരു പാട്ട്

പാട്ടു കൊണ്ട് ജീവിതദുരന്തങ്ങളെ അതിജീവിച്ച കൂട്ടുകാരിയെക്കുറിച്ചാണ് ഈ കുറിപ്പ്. സുഗന്ധിയെന്ന് നമുക്കവളെ വിളിക്കാം. മറക്കാനാവാത്ത ഒരുവള്‍. വിണ്ടുപോയ ചുണ്ടുകളെ പാട്ടോര്‍മ്മകളാല്‍ ജീവന്‍ വെപ്പിച്ച ഒരുവള്‍. ഒരു കൊച്ചു റേഡിയോയിലൂടെ ഊര്‍ന്നിറങ്ങിയ ശബ്ദവീചികളാണ് അവളെ ജീവിപ്പിച്ചത്. പ്രതീക്ഷകളുടെ അനേകം വിത്തുകള്‍ നമ്മളില്‍ പാകുന്ന ഓര്‍മ്മയാണ് അവളുടെ ജീവിതം-അഞ്ജലി ദിലീപ് എഴുതുന്നു

തിയോ ആഞ്ചലോ പൌലോ ഇനിയില്ല

1935ല്‍ ഏതന്‍സില്‍ ജനിച്ച അദ്ദേഹത്തിന്റെ ബാല്യ കൌമാരങ്ങള്‍ രണ്ടാം ലോകമഹായുദ്ധ കാലത്തെ നാസികളുടെ ഗ്രീക്ക് അധിനിവേശം, 1949ലെ ഗ്രീക്ക് ആഭ്യന്തര യുദ്ധം എന്നിവയിലൂടെയാണ് കടന്നുപോയത്. പില്‍ക്കാലത്ത് തിയോയുടെ ചിത്രങ്ങളില്‍ ഈ സംഭവങ്ങള്‍ പലവട്ടം കടന്നുവന്നു. ഏതന്‍സില്‍ നിയമവിദ്യാഭ്യസം പാതിവഴിയില്‍ നിര്‍ത്തി പാരീസില്‍ സാഹിത്യം പഠിക്കാന്‍ പോയ തിയോ പാരീസിലെ സ്കൂള്‍ ഓഫ് സിനിമയില്‍ ചേരാനുള്ള തീരുമാനം മാറ്റിവെച്ചാണ് ജന്‍മനാടായ ഗ്രീസിലേക്ക് തിരിച്ചെത്തിയത്. പ്രാദേശിക പത്രത്തില്‍ സിനിമാ നിരൂപകനായും പത്രപ്രവര്‍ത്തകനായും പ്രവര്‍ത്തിക്കുന്നതിനിടെ സൈനിക അട്ടിമറിയെ തുടര്‍ന്ന് ആ പത്രം നിരോധിക്കപ്പെട്ടു. തുടര്‍ന്നാണ് അദ്ദേഹം സിനിമാ നിര്‍മാണത്തിലേക്ക് നീങ്ങിയത്.